SUMBARKITA.ID – Baa kaba sanak, kama kito pai libur minggu kini ko?. Ado tampek wisata alam nan kami usulkan ka sanak, namonyo Talago Tarusan Kamang di kabupaten Agam. Tampeknyo di Jorong Babukik jo Jorong Halalang, Nagari Kamang Mudiak, Kecamatan Kamang Magek Kabupaten Agam, Sumatera Barat. Warga sinan acok manyabuiknyo jo Talago Tarusan sajo.
Ndak sumbarang talago ko doh sanak. Bak kicek-kicek urang, talago ko ajaib ko mah. Baa kok baitu, dek barubah-rubah. Kadang panuah dek aia, pado maso nan lain talago ko sarupo padang rumpuik sabana ijau. Kok lah jadi padang rumpuik, banyak urang bagubalo taranak di sinan tu. Mulai dari kambiang, jawi jo kabau.
Kok lah panuah aia nyo baliak, talago tarusan ko rami bana. Ado urang baranang-ranang, manangkok lauak, ado juo nan duduak-duduak santai jo keluarganyo. Kadang ado juo nan bapole di sinan.
Ado pulo nan bakaliliang talogo jo biduak, bafoto-foto bagai.
Kiniko ado nan batanyo, baa kok talago tarusan kamang ko bisa ajaib sarupo itu?
Bara urang ahlinyo pernah manaliti di sinan. Kironyo, ado batang aia bawah tanah. Itu makonyo aia bisa malimpah, kadang bisa pulo ilang tibo-tibo. Kicek pakarnyo sanak a, talago tu namonyo danau karst.
Danau karst ko, ketiko aia tanah naiak, lorong-lorong di bawah bukik batu gamping akan manyambuan aia. Padang rumpuik tatutuik, talago nampang gadang dek nyo. Tapi kalau aia suruik, padang rumpuik tacilak baliak.
Di talago Tarusan ko ado juo batu kapua nan lah baumua barabaik-abaik. Samantaro Talago tarusan ko umuanyo alah 70 ribu tahun. Banyak guo di bawah bukik karst, ado batang aia bawah tanah, jo talago bawah tanah.
Baa sanak, kalau ado waktu bajalan-jalan bagailah ka Talago Tarusan Kamang. Malapeh-lapeh panek, bawo bagai keluarga kito ka sinan. (ag/sk)